Wie er in einer seiner Predig 22. Mörder zu dem Herren bekehrt

 Zwen unnd zweintzig Mörder hatten sich zu sammen gethan / und in etliche finstere Wäld und Höltzergezogen / ermördeten die Durchreisenden jämmerlich / wie dann dises losen Gesinds wege der schwebenden Kriegsläuff Italia derselben Zeit voll war / förchteten jhnen nit verkleidet durch die Stätt unnd Flecken zu gehen / unnd herumb wie andere Adels Personen zu spatzieren.

Nun dise zwen unnd zweintzig also verkleidet / entschlussen sich deß heyligen Antonij Predig zu hören / dieweil sie vernamen / daß er wie ein anderer Helias / die Hertzen der Menschen mit der Fackel deß Worts anzündte: fanden solches wahr zu seyn / probiertens an jhnen selbsten / seyt mal zu Anfang der Predig sie jhre Hertzen zu erweichen / unnd nach unnd nach die Hitz deß heyligen Worts zu empfahen vermerckten / in massen / daß sie nach vollendter Predig alle jhme zu beychten giengen / unnd gute Besserung versprachen:

Denen sagte der heylige Vatter / er wolte sie absoluieren / sie solten sich aber wol und starck verhüten wider zu dem Unflat zu kehren / dann er vergwißte sie an Statt deß Herren / wo das geschehe / wurden sie alle ellendigklich sterben und verderben:

also erfolgte es hernach etlichen derselben / so wider zum Raub gewendet / die anderen aber seligklich verharret / under welchen sonderlich einer (welcher fleissig auff das End seiner guten und bösen Gesellen Acht gabe) hernacher offtermalen erzehlet / jhme wäre von dem Heyligen zu Buß aufferlegt worden / daß er zwölff mal Bilgers Weiß gen Rom / für Nachlassung seiner Sünden / die heyligisten Apostel zu besuchen / gehen müssen / unnd zu gleich wie er solches erfült / also hoffte er Verzeyhung derselben.